vblog

حتلاحظوا أني انهارده كتبت كثير في البلوج. عارفين ده بيحصل امتى؟ بيحصل لما بأشتغل بذمة. أيوه والله. لما بأبقى في مود الشغل مخي بيشتغل بسرعة 1000 كيلومتر في الساعة وما بأقدرش أخلي مخي يركز في حاجة واحدة بس. انهارده كان يوم إنجاز. وفي نهاية هذا اليوم المشهود قررت أحط لكم بلوج ثالث. ثاااااااااالث. في يوم واحد. ده غير كل الحاجات الثانية اللي طرأت على ذهني وكتبتها في البلوج على مدار اليوم. جالي اسهال بلوجنج معلش

أيوه بقيت مهووسة بنفسي. ودي علامة مرضية مقلقة. نصيبكم أني وصلت لسن أزمة منتصف العمر في وقت البلوج والفيديو بلوج والتويتر والفيسبوك. ما عنديش حاجة أتكلم عنها غير نفسي.

وبالمناسبة السعيدة دي قررت أجرب موضوع الفيديو بلوج ده. حأحاول كل يوم..أو كل كم يوم.. أعمل فيديو بلوج أتكلم عن أفكاري وهمومي. وبيني وبينكم بأعمل ده لنفسي أكثر ما بأعمله لأي حد. لما الواحد يخرج أفكاره للمجال العام بيقدر يحلل أفكاره بشكل أفضل. أو على الأقل دي نظريتي انهارده وخلينا نشوف.

عملت اليوم صباحا 2 فيديو بلوج. أيوه 2. عملت واحد…اتفرجت عليه…وحسيت أني محتاجة أعلق عليه فعملت الثاني

نصيبكم بأقولكم

قولوا لي رأيكم في مختبر نادية للفيديو بلوج. مصيري ألاقي حاجة أكثر إثارة أكلمكم عليها في الأيام الجاية